الجمعة، 2 يوليو، 2010

الهجرة إلى نيوزيلندا | كل شيء عنها

الهجرة إلى نيوزيلندا | كل شيء عنها

اولا هذا الموضوع منقول بالكامل وليس جهدي الشخصي وهو مجهود رائع من زميل محترم
ربنا يعوض تعب محبته على هذه المعلومات واليكم الموضوع


دي مجرد معلومات أنا جمعتها في الفترة الماضية وأرجو إنها تكون مفيدة للي يحتاجها
خلي بالكم إن المعلومات عن نيوزيلندا في المنتديات شحيحة جداً
بالمناسبة نيوزيلندا طالبة أيلتس جينرال 6.5 أوفر أول لمقدم الطلب الرئيسي و 5 للزوج أو الزوجة وأتوقع إنه مش سكور عالي قوي وفي المتناول

خلينا قبل ما نبدأ في الشرح التفصيلي لإجراءات الهجرة ... نتعرف أكتر على البلد
فيه دليل باللغة العربية فيه معلومات كويسة جداً عن نيوزيلاندا هو بالأساس موجه للدارسين لكنه مفيد برضه للي عايز يتعرف على البلد بشكل عام
هتلاقوا الدليل ده في الرابط التالي
4shared.com - free file sharing and storage

نيجي لإجراءات الهجرة نفسها...
لأ ...لسه شوية
فيه إجراء مهم لازم تعمله قبل ما تبدأ في إجراءات الهجرة
الإجراء ده هو ال Assessment لمؤهلاتك ولشهادات خبرتك
الموضوع ببساطة إن نيوزيلاند مش بتعترف بأي شهادة خبرة أو شهادة دراسية من أغلب بلدان العالم - من ضمنها مصر بالطبع والدول العربية - إلا بعد التصديق عليها من هيئة حكومية اسمها
NZQA
وموقعها على الرابط التالي
www.nzqa.govt.nz
لازم تعمل ال assessment قبل ما تعمل حاجة اسمها EOI ودي اختصار expression of interest ودي أول خطوة في إجراءات الهجرة
ال assessment ده له نوعين:
حاجة اسمها pre-assessment ده تكلفته 75 دولار نيوزيلاندي - كل كلامنا بعد كده بالدولار النيوزلندي عشان محدش يتلخبط وهو بيساوي حوالي 3.25 جنيه مصري
وحاجة تانية اسمها full assessment
الفرق بين الاتنين إن الأولانية محتاجها بس عشان تملا EOI ومش هتفيدك في أي حاجة بعد كده، ولما تيجي تقدم ورقك لما يطلبوه برضه هتحتاج تعمل full assessment
إنما ال full assessment تنفعك في الحالتين ، فنصيحة ما تفكرش في ال pre-assessment رغم إنها أسهل وأسرع وأرخص، لإنك في كل الأحوال محتاج تعمل full assessment
ودي اللي هيبقى كلامنا عليها في الرد القادم

نيجي لل full assessment
ودي بتقدم عليها عن طريق الموقع اللي أشرنا ليه في الرد السابق
وإجراءاتها باختصار إنك بتسجل على الموقع المذكور وتعمل account عليه
وتحدد انت بتعمل assessment لأي غرض وطريقة التسجيل سهلة وبسيطة
بتملا على الموقع بيانات مؤهلاتك الدراسية وخبرتك العملية
فيه نوعين من ال full assessment
fast track وده بيتكلف 600 دولار وبيستغرق 20 يوم عمل يعني حوالي شهر
و normal track وده بيتكلف 450 دولار وبيستغرق 35 يوم عمل يعني حوالي شهر ونصف أو شهرين تقريباً.
بعد ما تسجل على الموقع بتدفع بال credit card
خلي بالك اللي بيتبعت بعد كده أصول الأوراق - الشهادات الدراسية وشهادات الخبرة - فقط هي اللي مطلوبة في هذه المرحلة، خلي بالك الأصول مش الصور ومش محتاج توثق أي حاجة
ولو عايز الأصول ترجعلك بتدفع 36 دولار زيادة مصاريف إعادة الأوراق مرة أخرى، وطبعاً لو فيه ورق بالعربي لازم يترجم
بتبعت الورق وبعدها بفترة وجيزة بترجعلك أصول أوراقك لو كنت طلبت إنها ترجع، وبتقعد تستنى لغاية ما يردوا عليك بنتائج ال assessment
طبعاً الفترة دي ممكن تطول أكتر من المدة اللي هما محددينها وفي بعض الأحيان ممكن توصل لأربع أو خمس شهور، بسبب إنهم بيتحروا عن الشركات اللي انت اشتغلت فيها وبيراسلوا الجامعات اللي منها شهاداتك ، ولو الجهات اتاخرت في الرد يبقى طبيعي إنهم هيتاخروا هما كمان في الرد عليك.
الرد بيبقى في صورة report فيه ملخص نتائج ال assessment وتقييم خبراتك ومؤهلاتك بالمعايير النيوزيلندية
وفيه reference number ليك
تقدر تستخدمه بعد كده في خلال إجراءات الهجرة

Immigration New Zealand

التكلفة المالية:
1- ال Assessement ودي قلنا تكاليفها في السابق
2- ال EOI ودي 400 دولار
3- مصاريف ال processiong ودي بتعبتها بشيك مع الورق
ودي بتخلتف حسب الجنسية وحسب بلد الإقامة ، وممكن تعرفها من موقع الهجرة.
4- مصاريف اللاندنج
ده بخلاف مصاريف الكشف الطبي والإيلتس والفيش والتشبيه واستخراج الأوراق والبريد والكلام ده.
الأرقام بالتفصيل على موقع الهجرة
Immigration New Zealand
وإن شاء الله اكتبها خلال الشرح
الوقت ....الإجراءات سريعة جداً ، أكتر حاجة هتعطلك هي ال assessment اللي في الأول، بعد ما يخلص ويجيلك ال report ممكن كل الإجراءات تبقى منتهية وتاخد الفيزا في أقل من سنة

نيجي للخطوة التالية من من الأجراءات وهي البداية الفعلية لإجراءات الهجرة
وهي اسمها Expression of Interest أو اختصاراً EOI
لازم في الأول نعرف نظام النقاط، نظام النقاط معقد شوية وصعب الشرح ، وعموماً هتلاقوه في الملف الموجود على الرابط التالي
4shared.com - free file sharing and storage

وتقدر من خلاله إلى حد ما تقيم النقط اللي ممكن تجيبها.

اللي يجيب أقل من 100 نقطة: طلبه بيترفض مباشرة
ما بين 100- 140: طلبه بيدخل في قرعة ولو ما تمش اختياره بيخش القرعة التالية ليها بعد 6 شهور
أعلى 140: بيتم اختياره من القرعة اتوماتيكياً - أو بمعنى أصح معفى من القرعة
EOI دي زيها بالظبط زي ال simplified application بتاعت كندا، لكنها فيها ميزة عنها إنها بتقدر تملاها وتبعتها وتدفع الفلوس أون لاين من على الموقع الرسمي للهجرة
Immigration New Zealand

أول خطوة إنك بتعمل account لنفسك على الموقع وتاخد username و password
تقدر بعدها تدخل على ال account بتاعك ، وتبدأ تنشأ ال EOI الخاصة بيك
طبعاً الفئة اللي احنا بنتكلم عليها هي Skilled migrand Category
بالمناسبة في الموقع دايما لما يقول visa يبقى المقصود اللي بيقدم من خارج نيوزيلاند ولما يقول permit يبقى يقصد التقديم من داخل نيوزيلاند

ال EOI طويلة جدا ومملة جدا، وبتكتب فيها كل التفاصيل عن حياتك تقريباً - كل أوراقك - شهاداتك
حتى لدرجة أرقام شهادات الميلاد ورخص القيادة....كل كل حاجة

وهو في الموقع بيقولك إن ملئها بيستغرق حوالي أسبوع ، بس لو قعدت عليها ممكن تخلصها في يوم أو يومين
فيه ميزة كويسة قوي في الموقع، هو إن ال toolbar بتاع الموقع بيحسب النقاط بتاعتك بشكل تلقائي وانت بتدخل بياناتك ، وبالتالي عند نهاية كتابة ال EOI بتكون عرفت النقط بتاعتك بالظبط حسب التقييم بتاعهم ، وعرفت موقفك إذا كنت داخل القرعة أو معفى منها ، أو لا قدر الله مرفوض من الأساس.

خلي بالك وانت بتدخل بيانات مؤهلاتك الدراسية والعملية هتحتاج ال reference number بتاع ال NZQA ودي أهمية ال assessment اللي بتعمله في الأول خالص قبل ما تبدأ في إجراءات الهجرة.

بعد ما تخلص ال EOI بتعملها submit وتدفع الرسوم عبارة عن 400 دولار نيوزيلاندي بال credit card
أو بتطبعها وتبعتها بالبريد مع الرسوم ب draft chique بس تقريباً في الحالة دي الرسوم بتزيد 10 دولار إضافية.
والعنوان اللي بتبعت عليه مكتوب في الموقع حسب الجنسية وحسب الدولة اللي انت مقيم فيها


+

الرب معكم

‏هناك تعليقان (2):

  1. شكراً
    متعملش حسابى فى الهجرة أنا مش فاضى

    ردحذف
  2. لو آيلتس 6 أكاديميك بيتقبل ولا لأ؟

    ردحذف